الرسالة الأولى من دورة الاستعداد لرمضان | اطــرق بــابه

اطـرق بابه

الحمد لله وكفى وصلى الله وسلم على عباده الذين اصطفى ثم اما بعد:

مشروع الاستعداد لرمضان هذا العام هو مشروع بناء

فكرة البناء تتلخص فى بناء القلوب قبل رمضان

أعظم زاد تتزود به من رمضان هو أن تكون من عباد الله المتقين

قال ربنا :
[ كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ ]
[ إِنَّ أَكْرَمَكُمْ عِنْدَ اللَّهِ أَتْقَاكُمْ ]

بناء الايمان يحتاج إلى أربعة أمور عملية هى اللى جاءت فى مفتتح سورة المزمل وهى:

[ قُمِ اللَّيْلَ إِلَّا قَلِيلًا ]

[ وَرَتِّلِ الْقُرْآنَ تَرْتِيلًا ]

[ وَاذْكُرِ اسْمَ رَبِّكَ وَتَبَتَّلْ إِلَيْهِ تَبْتِيلًا ]

تعالوا نبتدى مع اول دعائم الايمان وهى:
>> قُمِ اللَّيْلَ إِلَّا قَلِيلًا <<

ازاى نعيش روح الصلاة والخشوع فى الصلاة؟؟؟؟

اول معنى فيه انك قبل الصلاة لازم تعظم من قدر الصلاة، لازم تعرف يعنى ايه صلاة

سيدنا ابن مسعود كان يقول: المصلى يقرع بابا ومن يُدِم قرع باب الملك يوشك ان يُفتح له

عايزَك تحس وعايزِك تحسى ان الصلاة بالنسبة لنا طرق على الباب, بنخبط على باب ربنا سبحانه وتعالى

اول معنى عاوزين نوصله هو: "عبادة الانطراح بين يدى الله"

يبقى انا داخل اصلى بنية ايه؟؟؟؟
انا واقف على بابك يا سيدى ويا مولاى

سيدنا حذيفة بن اليمان كان يقول: ما احب حال يحمد الله العبد عليها ان يجده عافرا وجهه
احب ان المعنى ده هو اللى اتقرب بيه لربنا سبحانه وتعالى,
ربنا بيحبنى اوى اوى وانا مستشعر انى معفر وجهى

هى دى نفس المعانى من الذل والانكسار اللى قبل ما ترفع ايدك وتقول الله اكبر تستسلم ليها. هل انت اصلا مستعد للمعنى ده؟؟؟؟

تكون مستعد بعبادة الانطراح
بعبادة انا واقف على بابك يا مولاى

سيدنا حذيفة كان بيقول ان دى من احلى الاحوال اللى الواحد بيدوق فيها طعم الذل والانكسار

اقرب ما يكون العبد من ربه وهو ساجد، اقرب ما يكون العبد من ربه وهو متذلل بين يدى ربه محقق الانطراح والانكسار ...

بكر بن عبد الله المُزنى كان يقول: " مَن مثلك يابن آدم خُلٍى بينك وبين الماء والمحراب متى شئت تطهرت ودخلت على ربك ليس بينك وبينه ترجمان ولا حاجب".

يلا استعد انت داخل على حضرة الملك، يلا استعد بقلبك احنا لسة متوضناش بس انت هتقابل مين!!!!!!!!

عارف لما يكون واحد بيحب حد واداله ميعاد كل شوية يقول هييجى يوم كذة يوم كذة من شوقه لليوم ده بيعمله استعدادات خاصة

لو واحد جاى يتقدم لعروس يتهيأ ويبقى لابس احسن حاجة عنده ويشترى اشياء خاصة عشان يجمِل بيها نفسه وهى

نفس الكلام تتزين للقاء ده، فما بالك وانت هتقف بين يدى الملك

عايزكم تحسوا بالمعنى ده وتتعبدوا ربنا سبحانه وتعالى باحساس عبد الملك

كل مرة عايز اربطك باسماء ربنا اصل احنا عندنا ركن من اركان بناء الايمان اسمه اذكر اسم ربك، فأذكر اسم ربى فين هنا؟؟؟؟

عايزك تذكر اسم ربك العزيز، عايزك النهاردة وانت بتقرأ ورد القرآن كل ما يعدى عليك اسم العزيز تفتكر عبادة الانطراح

وعايزك النهاردة تتعبد الله باسمه الملك وتفتكر الملك المالك المليك عشان انت بعد شوية هتبقى بين يدى الملك جل جلاله

اسال الله ان يحبب الينا الايمان وان يزينه فى قلوبنا وان يكره الينا الكفر والفسوق والعصيان انه ولى ذلك والقادر عليه وصلى الله وسلم على سيدنا محمد وعلى اله وصحبه وسلم

للمشاهدة بدون تحميل مباشرة على اليوتيوب