صح وغلط وقصة طريفة | حلقة 25

ومع الحلقة رقم 25

من سلسلة

" صح وغلط وقصة طريفة "

زي متفقنا حنركز شوية على جزء صح للأهميه في هذه العشر

______________________________________

1- صح :-

جزء صح انهارده ينقسم لحاجتين .. وعلشان منطولش ندخل في الموضوع على طول

الجزء الأول : هو ذكر نقوله بعد صلاة الصبح مع اذكار الصباح

وهذا الذكر مهم جدا وثوابه كبير جدااا

عن جويرية أن النبي صلى الله عليه وسلم خرج من عندها بكرة حين صلى الصبح ، وهي في مسجدها ، ثم رجع بعد أن أضحى وهي جالسة قال: '' ما زلت على الحال التي فارقتك عليها ؟ '' ، قالت: نعم ، قال النبي صلى الله عليه وسلم: '' لقد قلت بعدك أربع كلمات ثلاث مرات ، لو وزنت بما قلت منذ اليوم لوزنتهن: سبحان الله وبحمده عدد خلقه ورضاء نفسه ، وزنة عرشه ، ومداد كلماته

 الحديث معناه أن النبي صلى الله عليه وسلم صلى الصبح ثم خرج وعاد للسيدة جويرية رضى الله عنها بعد الضحي أى بعد حوالى ساعة ونص أو ساعتين تقريبا فوجدها على نفس حالها من الذكر .. فقال لها عليه الصلاة والسلام أنه قال أربع كلمات ثلاث مرات ثوابها يعادل بل أكثر مما قالت السيدة جويرية فى كل هذا الوقت والكلمات هي :-

سبحان الله وبحمده عدد خلقه ورضاء نفسه ، وزنة عرشه ، ومداد كلماته

 القول لن يأخذ 10 ثواني والأجر عظيم

 والأجر عظيم : يعادل ذكر وقت طويل بل ويفوقه

الجزء الثاني : غدا إن شاء الله يوم الجمعه وعايزين نتذكر حاجه مهمه جدا في يوم الجمعه كثير اوى مننا مبياخدش باله ومبيعملهاش

فعايزين نخلي بالنا ونحافظ عليها إن شاء الله في رمضان أو غير رمضان

ايه هي بقه الحاجه ديه ؟؟

قال صلى الله عليه وسلم :

أكثروا الصلاة علي يوم الجمعة و ليلة الجمعة فمن صلى علي صلاة صلى الله عليه عشرا

 فلا تنسوا الاكثار من الصلاه على النبى صلى الله عليه وسلم

 ولتكن صيغة الصلاة مثلا : اللهم صل على محمد وآل محمد كما صليت على إبراهيم وآل إبراهيم

 ---------------------------

 واذكركم بالدعاء يوم الجمعة فهناك ساعة إجابة بالإضافة إلى أننا في شهر رمضان .. والدعاء مستحب في شهر رمضان

يبقى سريييييييييعا الحاجتين هنا :-

1- ذكر نحفظه ونحافظ عليه كل يوم بعد صلاة الصبح " سبحان الله وبحمده ، عدد خلقه ورضاء نفسه وزنة عرشه ومداد كلماته " ثلاث مرات

2- نكثر من الصلاة على النبي عليه الصلاة والسلام يوم الجمعه

ومتنسوناش والمسلمين من صالح دعائكم

 __________________________________

2 - غلط :-

كثير اوى ممكن من الشباب اللى يطلق بصره .. مبيغضش بصره ..سايبه يعمل سيرش في كل حته

فتلاقيه طول مهو ماشي في الشارع بينظر للبنات المتبرجات وغير المتبرجات وبرضه ممكن تلاقى من البنات اللى بتنظر للولاد

و شهر رمضان جه

وصاحبنا مفيش اى فايده .. عينيه كاميرا ديجيتال

مفيش حد يعدّى قدامه إلا ويقعد ينظر .. وده ممكن يبوّظ صيامه

فواحد صاحبه شافه مفيش اى فايده رمضان مش رمضان هو لازم يصوّر أى حد يعدّي قدامه

فعايز ينصحه : يا أخي انت ايه الحكاية حرام عليك كده

بطاريات عينيك حتفضي !! ايه مش سايب اى حد يعدّي الا و حتنوّمه مغناطيسي

مينفعكش كده يبنى انت صايم !! وحتى لو مش صايم مينفعش تسيب بصرك كده وتبص للنساء والبنات

لا في الشارع ولا حتى في التلفزيون

انت مسمعتش حديث الرسول عليه الصلاة والسلام :

" النظرة سهم مسموم من سهام إبليس من تركها من مخافتي أبدلته إيمانا يجد حلاوته في قلبه."

..........................

أظن كل الناس سمعت الحديث ده !!ا

بس المشكلة ..

ان الحديث ده : ضعيف جدا

يعنى مش ضعيف بس حته .. لا ضعيف جدا

وانظر ضعيف الترغيب والترهيب حديث رقم 1194

طيب يعنى هو يعنى صاحبنا اللى بينصح صاحبه ده غلطان ؟؟

لا طبعا مش غلطان وكلامه كله صح ماعدا الحديث ده .. ولازم ننصح كل واحد من صحابنا سايب بصره كده ومبيغضوش

 وكمان ننصح كل واحده متبرجه انها تلتزم بالحجاب الشرعي

وهناك من الآيات والأحاديث الصحيحه ما يغنى عن هذا الحديث بفضل الله عزّ وجلّ

طيب لو سمعنا الحديث ده بيتقال ؟؟

معلش احنا في العشر الأواخر .. تعالوا على نفسنا بقه

وبرااااحه

_________________________________

3- قصة طريفة :-

ذكر ابن الجوزي -رحمه الله- :-

" قيل لبعض البله وكان يتحرى - بيخاف - من الغيبة : ما تقول في إبليس ؟ فقال : أسمع الكلام عليه كثيراً والله أعلم بسريرته "

!!!!

طبعا ده مش ورع .. ده ورع كاذب

فيه حاجات مينفعش يكون فيها التورع ده

زي كثير جدا من المسلمين بيتورعوا -ورع كاذب- أنه يقول على غير المسلم أنه كافر

ده كمان فيه ناس بتتورع -ورع كاذب- بزيادة ويقولك هما مؤمنين برضه !!ا

يعنى لو هما مؤمنين واحنا مؤمنين وكل الناس مؤمنين يبقى مين الكافرين اللى حيخشوا النار ؟!ا

لا الحاجات اللى فيها نص صريح صحيح مينفعش اننا ننفيها أو ننكرها بسبب ورع مزعوم

مينفعش نقول ان ابليس مكفرش !!ا

وديه سمعتها بودنى من واحد بيتكلم في الدين .. الله المستعان يعنى

مينفعش نقول عن أهل الكتاب الموجودين دلوقتى انهم مش كفار

تانى حاجه .. الصح يتقال عليه صح .. والغلط يتقال عليه غلط

مينفعش الصح يبقى غلط والغلط يبقى صح علشان فلان ميزعلش مننا

يعنى فلان مهم ورضا الله مش مهم ؟!ا

مينفعش واحد مجاهر بمعاصي وبيقول حاجات غلط وتيجى تحذر من اللى بيعمله

حد يطلع يقولك اتق الله ومتغتابوش !!ا .. يعنى هو ينشر الباطل في كل حته وانت لما تيجى تبين يبقى بتغتاب!!ا

نسكت بقه ونسيب كل واحد ينشر الباطل براحته علشان منبقاش اغتبنا حد ؟؟

مين بقه يدافع عن السنة وعن الدين ومين يحافظلنا على ديننا لو سيبنا كل اللى بيقول بدع واباطيل من غير محد يرد عليه ؟!ا

يعنى مثلا واحد يقول على شئ محرم وفيه اجماع على انه حرام يروح هو قايل انه حلال

حد ييجي يتكلم ويقول فلان يخترع رأي جديد .. يروح واحد قايله بس اسكت اتق الله .. بلاش غيبه

ديه من المفاهيم الغلط .. الورع الكاذب .. واننا نخاف على مشاعر فلان ليزعل ونسيب الغلط اللى بيعمله ينتشر علشان هو ميزعلش

مينفعش !!ا

وصحيح مين الناس الكثير اللى قال عليهم الجدع اللى فوق ده اللى بتتكلم عن ابليس ؟؟ هي الغيبه بقت سهله كده ؟؟